Rev 4 | KPG | STEP | I di gowaa deenei, au ne hai dagu moe, ne mmada gi di bontai mahuge i di langi. Gei di lee e hai be di lee-‘trumpet’ dela ne hagalongo ginai au i mua, ga helekai, “Hanaga gi kinei, gei au ga hagi adu gi di goe nia mee ala ga hai nomuli.”

a 4.2-3:Ezek 1.26-28, 10.1

b 4.5:Ex 19.16; Rev 8.5, 11.19, 16.18; Ezek 1.13; Rev 1.4; Zech 4.2

c 4.6-7:Ezek 1.22, 5-10, 10.14

d 4.8:Ezek 1.18, 10.12; Is 6.2-3

Revelation of John 4

Taumaha i di langi

1 I di gowaa deenei, au ne hai dagu moe, ne mmada gi di bontai mahuge i di langi. Gei di lee e hai be di lee-‘trumpet’ dela ne hagalongo ginai au i mua, ga helekai, “Hanaga gi kinei, gei au ga hagi adu gi di goe nia mee ala ga hai nomuli.” 2 Di madagoaa hua deelaa, gei au gu huahua go di Hagataalunga, ga gidee au di lohongo king i di langi e noho tangada i ono nua. ^a 3 Ono golomada e maahina gadoo be nia hadu hagalabagau be nia ‘jasper’ mo nia ‘carnelian’, gei di umada e gono gi di hadu-‘emerald’, e haganiga i di gili di lohongo king. 4 Nia lohongo aamua e madalua maa haa e haganiga di lohongo king, e noho ai digau mmaadua aamua e madalua maa haa, e ulu nadau gahu kene, e ulu nia hau goolo. 5 Nia ila e dabadaba, nia lee llauehe, mo nia lee atili e loomoi i di lohongo king deelaa. Nia malama e hidu e ulaula i mua di lohongo deelaa, go nia hagataalunga e hidu a God. ^b 6 Gei di mee dela e hai gadoo be di tai kalaadi, e maalama be di kalaadi-“crystal”, la i-mua labelaa di lohongo deelaa.

Gei nia baahi huogodoo o di lohongo deelaa, le e haganiga gi nia manu mouli e haa, nadau golomada i nadau mua mo i muli. ^c 7 Tahi manu le e hai be di laion. Di lua manu le e hai be di kau daane. Di tolu manu le e hai ono hadumada be nia hadumada dangada, ge di haa manu le e hai be di manu-‘eagle’ e maangi. 8 Nia manu mouli e haa le e dagi nadau bakau, nadau gili gu buni golomada, i lodo mo i tua. Aa mo boo, gei digaula e dee noho di nadau dadaahili boloo,

“Dabuaahia, dabuaahia, dabuaahia, go Dimaadua go di God Aamua Huoloo, dela nogo i golo i mua, i golo dolomeenei, mo dela ga hanimoi.” ^d
9 Nia manu mouli e haa le e daahili nia daahili hagaamu, hagalaamua mo di danggee ang gi tangada dela e noho i hongo di lohongo king, dela e mouli ga hana hua beelaa. Digaula ma ga hua nadau daahili, 10 gei digau mmaadua aamua e madalua maa haa la ga pala gi lala i mua tangada dela e noho i hongo di lohongo king, ga daumaha ang gi mee dela e mouli ga hana hua beelaa. Digaula ga kili nadau hau goolo gi lala i mua di lohongo king, ga helekai,

11 “Di madau Dagi mo di madau God! Goe e tau anga bolo e wanga ginai di madamada, di hagalaamua, mo di maaloo. Idimaa, ma kooe dela ne hai nia mee huogodoo, ga hai nia maa gi i golo mo di mouli mai i doo hiihai!”

Revelation of John 4

Taumaha i di langi

Taumaha i di langi